Əliyev “B” kateqoriyalı hakim statusu qazandı

İspaniyanın Malaqa şəhərində Avropa Cüdo Birliyi (EJU) tərəfindən hakimlər üçün “B” kateqoriyalı beynəlxalq dərəcəli hakim adının alınması üçün imtahan keçirilib.

Sports.az xəbər verir ki, imtahanda Azərbaycan Cüdo Federasiyasının (ACF) hakimlər heyətinin üzvü Ülvi Əliyev də iştirak edib.

İlkin olaraq hakimlər nəzəri hissəyə dair 60 sualdan ibarət imtahandan keçiblər. Daha sonra, 14-15 oktyabrda keçirilən böyüklər arasında Avropa Kubokunun görüşləri idarə edərək praktiki imtahan veriblər. Həm nəzəri, həm də praktiki imtahanı yüksək nəticə ilə keçən Ülvi Əliyev “B” kateqoriyalı beynəlxalq hakimlik lisenziyasını əldə edib.