Üç güləşçimiz Avropa çempionu oldu
Rumıniyanın paytaxtı Buxarestdə 23 yaşadək güləşçilər arasında Avropa çempionatı davam edir.
Sports.az xəbər verir ki, yarışın ikinci günündə 60, 67, 72, 82 və 97 kq-da yer alan yunan-Roma güləşçilər çıxış edib.
Mübarizəyə 1/4 finaldan qoşulan Elmir Əliyev (60 kq) türkiyəli Mert İlbarsla gərgin keçən görüşdə əzmkar qələbə qazanıb – 6:5. Həmyerlimiz yarımfinalda gürcüstanlı Dimitre Xaçidzeni üstələyib – 7:1. Elmir finalda israilli Melkamu Fetene ilə qarşılaşıb və rəqibinə 5:3 hesabıyla qalib gələrək Avropa çempionu olub.
Həsən Məmmədli (67 kq) debütdə israilli Mixail Portmanna heç bir şans tanımayıb – 10:1. Güləşçimiz 1/4 finalda türkiyəli Mustafa Yıldırıma məğlub olub – 2:4. Ancaq rəqib finala yüksəldiyi üçün Həsən bürünc medal uğrunda bolqarıstanlı İvo İliyevlə güləşib. Gərgin keçən qarşılaşmadan 8:10 hesablı məğlubiyyətlə ayrılan Məmmədli 5-ci yerlə kifayətlənib.
Qurban Qurbanov (72 kq) ilk mərhələdə xorvatiyalı Luka Malobabiçi vaxtından əvvəl xalçadan məyus yola salıb – 8:0. Qurbanov 1/8 finalda rumıniyalı İqor Botezdən güclü olub – 6:0. Qurban 1/4 finalda finlandiyalı Coni Komppaya qalib gəlib – 4:1. Yarımfinalda gürcüstanlı Giorgi Çixvadzeylə görüş gərgin mübarizə şəraitində keçib. Sonuncu xal prinsipinə əsasən (1:1) rəqibini üstələyən güləşçimiz adını finala yazdırıb. Qurbanov həlledici qarşılaşmada ukraynalı İrfan Mirzoyevə heç bir şans tanımayıb. Rəqibinə tam üstünlüklə (8:0) qalib gələn Qurban ölkəmizə 2-ci qızıl medalı qazandırıb.
İsmayıl Rzayev (82 kq) 1/8 finalda Norveç təmsilçisi Eksaus Mukubuya uduzub – 0:9. Ancaq rəqib finala yüksəldiyi üçün güləşçimiz bürünc medal uğrunda mübarizəni davam etdirmək şansı əldə edib. Rzayev təsəlliverici görüşdə polşalı Adam Qardziolaya uduzub - 0:9.
Murad Əhmədiyev (97 kq) debütdə serbiyalı Luka Katiçə qalib gəlib – 7:2. Pəhləvanımız 1/4 finalda ukraynalı Aleksandr Yevdokimovu məğlub edib – 5:2. Əhmədiyev yarımfinalda almaniyalı Lukas Lazogianisi 7:4 hesabıyla üstələyərək finalda macarıstanlı Aleks Şokeyə rəqib olub. Həlledici görüş çox çəkməyib. Rəqibini əks-fənddə yaxalayan Murad "tuş"la qalib gələrək Avropa çempionu olub.
