Özümüzü ögey hiss etdiyimiz bayram

Təssüf ki, AVRO 2024 və Kopa Amerika 2024 eyni vaxtda keçirilirdi...

Sports.az saytının hər iki turnirə rəsmi akkreditasiyası olan əməkdaşı kimi yalnız Almaniyadakı yarışa gedə bildim. 

Lionel Messinin karyerasında bəlkə də son böyük turnirin - Kopa Amerikanın açılış və final matçlarına, həmçinin başqa oyunlara akkreditasiyam olsa da, ABŞ-a yollanmadım. 

ETOPAZ-ın dəstəyilə Avro 2024 1/4 final mərhələsinin Niderland - Türkiyə oyununu Berlin Olimpiya stadionunun media sektorundan izləyən yeganə azərbaycanlı idman jurnalisti idim.
Qardaş ölkədən bu qarşılaşmaya çox sayda media nümayəndəsi getmişdi. Məsələn, TVNET-in əməkdaşı təkcə onların televiziyasından 8 nəfərin gəldiyini dedi. 

Təssüf ki, Türkiyə bu qarşılaşmadan sonra mübarizəni dayandırdı. Bununla belə, ay-ulduzlular gözəl oyunları ilə çempionata xüsusi rəng qatdı. Eyni sözləri Gürcüstan millisi haqda da deyə bilərəm. 

İdman mediasına daimi diqqəti ilə seçilən ETOPAZ-ın sponsorluğu ilə bir qrup idman jurnalisti çempionatın ən maraqlı oyunlarından birini - məhz yuxarıda qeyd etdiyim Türkiyə ilə Gürcüstan millilərinin matçını Dortmundda "Siqnal İduna Park" stadionunun tribunalarından canlı izlədi. 

Azərbaycan İdman Jurnalistləri Assosiasiyasının vitse-prezidenti Natiq Nəsirovun azərbaycanlı media nümayəndələrinin bu turnirə akkreditasiya alması üçün çəkdiyi əziyyəti də xüsusi vurğulamalıyam. Onun sayəsində bir neçə həmkarımız Avro 2024-ün final mərhələsinin matçlarına rəsmi akkreditasiya aldı. 

İctimai Televiziya ilk dəfə bir böyük futbol turnirini bu qədər gözəl işıqlandırdı. İTV-nin Almaniyada olan əməkdaşları qitə çempionatının davam etdiyi hər gün ordan rəngarəng süjetlər hazırlayıb Azərbaycan üçün bir ilkə imza atdılar. 

Çempionatın ən parlaq komandası şübhəsiz İspaniya idi. Bu mənada ədalətin bərqərar olduğunu demək olar. İspanlar çempionluğu haqq edirdi. 

Beləcə, daha bir Avropa Çempionatını geridə buraxdıq. Təəssüf ki, nə qədər yaxından iştirak etsək də, bu bayramda özümüzü bir qədər ögey hiss edirdik. Türkiyəyə, Gürcüstüna, Ukraynaya, İspaniyaya, İngiltərəyə, başqalarına azarkeşlik edə-edə bu çempionatı da yola verdik...

Növbəti qitə çempionatının finalında Azərbaycan millisini görmək arzu ilə!