...Və Allah Qurbanı göndərdi
1994-cü il avqustun 9-u "Şükrü Saracoğlu" stadionu tarixə şahidlik edirdi.
İlk dəfə Azərbaycan klubu avrokuboklarda oyuna çıxırdı. İstanbulda "Turan"ın heyətində Qurban Qurbanov da vardı… Qarşılaşma 0:5 hesablı məğlubiyyətimizlə bitdi.
Bu, başlanğıc idi. Çox üzücü olsa da, bundan daha betər nəticələri ağlımıza da gətirmirdik. Amma avrokuboklarda qarşıda "Neftçi"ni Sofiya "Lokomotiv"indən 0:6, "Vidzev"dən 0:8, "Xəzri"ni Krakov "Hutnik"indən 0:9, əsas milli komandamızı İspaniyadan 0:6, Portuqaliyadan 0:7, Polşadan 0:8, Fransadan 0:10 kimi nadir hesablarla darmadağınlar gözləyirdi...
Hələ ilk ağlıma gələnləri deyirəm...
İllərdir Azərbaycan futbolunda "imzam var" deyən futbolçular, özünü mütəxəssis, məşqçi hesab edən veteranlar, yəqin bu "uğurları" ilə öyünür.
Allah üzümüzə baxdı, Qurban Qurbanov kimi məşqçini göndərdi. Yoxsa belə də davam edəcəkdik. Nə 20 ilə yaxındır futbolumuza buraxılan milyonlar, nə də başqa heç nə Azərbaycan futbolunu San Marino, Andorra və başqa "cırtdanlar"la ənənəvi autsayderlər cərgəsindən xilas edəsi deyildi.
Əslində, bügünəcən olan nəticələr də bunu göstərir. "Qarabağ"ı kənara qoysaq, yalnız 1 dəfə "Neftçi" və 2 dəfə "Qəbələ" avrokubokların qrup mərhələsində oynayıb.
Milli komandamız haqda danışmaq ümumiyyətlə, böyük ürək ağrısıdı. Buna görə də bu haqda danışmasaq yaxşıdı.
"Turan"la başlayan bu yol elə təxminən təcrübəsiz tovuzluların ilk oyunda İstanbul nəhəngi ilə görüşdəki nəticə ilə davam edəcəkdi.
Azərbaycan futbolu qitədən ən azı 0:5 hesabı ilə geridə idi. Mənə görə, "Qarabağ"ı saymasaq, indi də elədi. Hətta, bu müqayisədə 0:5 yaxşı nəticədi.
Futbolla maraqlananlar, jurnalistlər, ekspertlər həmişə ölkəmizdə idmanın şahı haqda danışanda "Qarabağ"ı kənara qoysaq" deyir...
"Qarabağ" avrokuboklardakı debüt oyunumuzdan düz 28 il sonra Macarıstanda qazandığı uğurla bu fikri daha da möhkəmləndirir.
28 il öncə futbolçu kimi "Turan"la 0:5 uduzan Qurbanov indi məşqçi kimi futbolumuzdan 5:0 öndədi.
"Qarabağ" Azərbaycan futbolunun səviyyəsini çoxdan aşıb. Bu mövsüm göstərilən oyun isə həqiqətən də babat Avropa standartıdır.
Əminəm, "Qarabağ" "Viktoriya"nı da keçib Çempionlar Liqasının qrupuna yüksələcək.
İnanmaq istəyirəm ki, bununla futbola dövlət nəzarəti, diqqəti də güclənəcək. Ən azı bu sahəyə ayrılan pulların ciblərə getməməsi, uşaq futbolunun təməlinin qurulması arzusuna görə...
"Qarabağ"a isə təşəkkürlər! Avropada, dünyada ölkəmizin, futbolumuzun durumunu çox da yaxşı bilmirlər. Bu klub Azərbaycan haqda yalnız və yalnız müsbət rəy formalaşdırır.
