“Mən heç kimə lazım olmayan insanam” - Samir Ələkbərov
Müstəqilliyin ilk illərində Azərbaycan futbolunun ən parlaq simalarından biri, şübhəsiz ki, Samir Ələkbərov olub. Uzun müddət “Neftçi”nin formasını geyinmiş, İsraildə legioner həyatı yaşamış və Azərbaycan millisinin şərəfini qorumuş 54 yaşlı mütəxəssis hazırda işsizdir.
Futbolçu karyerasını bitirdikdən sonra “Neftçi”, “Xəzər Lənkəran”, “Sumqayıt” kimi klublarda köməkçi-məşqçi kimi fəaliyyət göstərmiş, bir müddət U-21 yığmamıza rəhbərlik etmiş Ələkbərov uzun müddətdir sevimli peşəsindən uzaq düşüb.
Samir müəllimin incikliyi Sports.az saytının əməkdaşı ilə söhbətində də aşkar hiss olundu.
- Nə işlə məşğulsunuz, Azərbaycan millisində oynamış biri kimi kənarda qalmaq sizi narahat eləmir?
- Mən heç kimə lazım olmayan bir insanam. Fikirlərim də kimsəyə maraqlı deyil. Bununla barışıb danışmaqla qurtarmışam.
- Siz də futboldakı problemləri deməyəcəksinizsə, bəs kim deyəcək?
- Əvvəllər dediyimizi bir qulaqdan alıb, digərindən buraxırdılar. İndi qulaqlarını elə tıxayıblar ki, deyirsən də veclərinə deyil.
- Yorulmusunuz?
- Neçə dəfə demək olar? İnanın ki, danışmaq artıq mənim özümə də maraqlı deyil.
- Futbolu izləyirsiniz?
- İnanırsınız, heç bir oyuna baxmıram, heç nə ilə maraqlanmıram. Kimin harada oynamasından, hansı nəticə göstərməsindən məlumatsızam. Elə vaxtım da yoxdur. Oturub sırf çempionat oyunlarını izləyib təhlil eləmək mənlik deyil.
- Çox incik görünürsünüz...
- Əlbəttə. Məncə, bu sualları işləyənlərə versəniz, daha yaxşı olar. Kim kimlə oynayırsa, mən neyləyim? Mənə onlar lazımdır? O qədər problemlərim var ki...
- Danışdıqlarınızı işıqlandırsaq, problem olmaz?
- Guya danışdıqlarım kimə lazım olacaq ki? Yazmağınızda heç bir problem yoxdur. Amma inanmıram ki, fikirlərim kiməsə maraqlı olsun.
