Zurna-balaban sədaları altında dünya çempionluğu!

Yaddaşım yanılda bilər, amma hansısa komanda idman növündə dünya çempionu olduğumuzu xatırlamıram.

Komanda növündə, üstəlik adında "futbol" sözü olan istənilən idman növündə Azərbaycanın dünya çempionu olması ikiqat qürurludu!

Özü də Bakıda, zurna-balaban sədaları altında!

Möhtəşəm atmosfer, inanılmaz azarkeş dəstəyi! 

Baklda keçirilən minifutbol üzrə dünya çempionatında Azərbaycan milli komandası finalda 2 il əvvəl uduzduğu Macarıstan üzərində parlaq qələbəylə planetin ən güclüsü adını qazandı!

Heyətimizdə 1 nəfər də olsun legioner yox idi. Hamısı azərbaycanlı, hamısı öz uşaqlarımız!

Azərbaycan Minifutbol Federasiyasına Milli Gimnastika Arenasında keçirilən çempionatın mükəmməl təşkilinə görə təşəkkür düşür.

Millinin çox dəyərli baş məşqçisi var. Elşad Quliyev böyük futbolda da uğur qazanacaq potensialdadı. 

Dünya və Avropa çempionu Elşad müəllim və futbolçuları başda olmaqla bu zəfərdə əməyi keçən hər kəsi  təbrik edirəm!

Təbriklər, Azərbaycan! 

Təbriklər, dünya azərbaycanlıları!