Azərbaycan çempionatının açılış mərasimi keçirilib
Şahmat üzrə Azərbaycan çempionatının açılış mərasimi keçirilib.
Sports.az xəbər verir ki, ilk olaraq Dövlət Himni səsləndirilib.
Ardınca Vətən Müharibəsi şəhidlərinin, Bakı-Qroznı reysində həlak olanların və ölkə şahmatının inkişafında xidmətləri olan Qasım Həşimovun xatirəsi bir dəqiqəlik sükutla yad olunub.
Açılış mərasimində Azərbaycan Şahmat Federasiyasının prezidenti Mahir Məmmədov çıxış edərək tədbir iştirakçılarını salamlayıb: "Çox şadam ki, güclü şahmatçılar çempionatda iştirak edəcəklər. Buna nail olmaq üçün xeyli işləməli olduq. Azərbaycanın hüdudlarından kənarda yaşayan şahmatçılar da yarışda mübarizə aparacaq. Bu da sevindirici haldır. Müəyyən mənbələrə əsaslanaraq demək olar ki, bu yarış kişilər arasında Azərbaycanın 80-ci, qadınlar arasında 75-ci çempionatıdır. Yarışın ədalətli keçməsini istəyirik. Şahmatçıların taxta arxasında döyüşkən və fəal mübarizə aparacağına ümid edirik. Əsl idman mübarizəsi olacaq. Maraqlı partiyalar görəcəyik. Hamınıza uğurlar arzulayıram".
Ardınca Ulu Öndər Heydər Əliyevin Azərbaycan şahmatının inkişafında misilsiz rolundan danışan video göstərilib.
Gənclər və İdman Naziri Fərid Qayıbov ölkə başçısının hər il idmançılarla görüşdüyünü söyləyib: "Təltif olunan arasında şahmatçımız da oldu. Daha yaxşı nəticələr əldə edəcəyimizə inanıram. Azərbaycan Şahmat Federasiyası yaxşı işlər görür. Azərbaycan çempionatının səviyyəsi qalxıb, şahmatçılarımız da buna layiqdirlər. Bu idman növü ölkəmizdə çox məşhurdur. Şahmatda nəticələrimiz ildən-ilə yaxşılaşır. İnanıram ki, bizi maraqlı çempionat gözləyir".
Sonra “Sirab” brendi fəxri tərəfdaş olaraq Azərbaycan Şahmat Federasiyası tərəfindən təltif olunub.
Turnirin tanıtım videoçarxı nümayiş etdiriləndən sonra püşkatma mərasimi keçirilib. Püşk mərasimində AŞF-nin baş katibi İlahə Qədimova və İqtisadiyyat Nazirliyi yanında Dövlət Vergi Xidmətinin rəisi Orxan Nəzərli iştirak edib.
Qeyd edək ki, ölkə çempionatında 1-ci mərhələnin oyunları fevralın 1-i saat 15:00-da start götürəcək. Kişilərin yarışının mükafat fondu 60 min, qadınlarda isə 30 min manat təşkil edir. Kişilərdə 26, qadınlarda 16 qrossmeyster ölkə çempionu adı uğrunda mübarizə aparacaq.
