“Kuboku qazanmayana qədər bunun bir əhəmiyyəti yoxdur” - Dambrauskas

“Sabah” Azərbaycan kubokunun yarımfinal mərhələsinin cavab matçında bu gün “Qarabağ”ı qəbul edib.

Sports.az xəbər verir ki, 2:1 hesabı ilə qalib gələb “bayquşlar”ın baş məşqçisi Valdas Dambrauskasın oyundan sonra mətbuat konfransı keçirilib. Litvalı mütəxəssis qələbəni azarkeşlərə həsr etmək istədiyini bildirib:

“Sabah” ailəsini təbrik edirəm. Qələbəni azarkeşlərimizə həsr etmək istəyirəm. Başabaş mübarizə getdi. Oyunda çətin anlarımız oldu. Düşünürəm ki, oyunun açar anı buraxdığımız qol oldu. Bundan sonra geridönüş edə bildik. Əzmkarlığımız və inadkarlığımız sayəsində qələbə qazana bildik. Düzdür, bu gün bu qələbəni bir az qeyd edəcəyik və ondan sonra qarşıdakı oyunlara hazırlaşacağıq. Finala çıxdıq, amma kuboku qazanmayana kimi bunun bir əhəmiyyəti yoxdur.

Hakim qərarları ilə bağlı şərh vermək istəmirəm. Bu, onların işidir. Biz Azərbaycanda futbolun səviyyəsini yüksəltmək istəyiriksə, hakimlik də inkişaf etməlidir. Bir neçə ölkədə baş məşqçi kimi fəaliyyət göstərsəm də, heç bir yerdə hakim qərarlarının bu qədər müzakirə olunduğunu görməmişəm. Bəzən elə olur ki, eyni epizodda lehinə qərar verilir, bəzən də əleyhinə.

Final bir oyundan ibarətdir. Mən hələ həyatımda asan final görməmişəm. Həmişə çətin olur. Ümid edirəm ki, final günü yaxşı gün olacaq və hansı komanda güclüdürsə, o da qalib gələcək”.