“Real”da daha bir ciddi itki

"Real" müdafiəçisi Ferlan Mendinin zədəsi ilə açıqlama yayıb.

Sports.az xəbər verir ki, "kral klubu"nun məlumatına görə, tibbi heyət tərəfindən aparılan müayinələr nəticəsində fransalı futbolçunun sağ ayağının düz əzələsinin vətərində zədələnmə aşkarlanıb. Hazırda müayinənin yekun nəticələrinin dəqiqləşdirildiyi bildirilir.

COPE nəşrinin yaydığı məlumata görə isə, təcrübəli müdafiəçinin təxminən 5 ay yaşıl meydanlardan uzaq qalmaq ehtimalı var.

Qeyd edək ki, futbolçu İspaniya La Liqasının 34-cü turu çərçivəsində "Espanyol"a qarşı keçirilən və "Real"ın 2:0 hesablı qələbəsi ilə başa çatan matçın 14-cü dəqiqəsində xəsarət alaraq əvəzlənmək məcburiyyətində qalıb.