Azərbaycan millisi Qoridə 3-cü oldu
Gürcüstanın Qori şəhərində keçirilən cüdo üzrə böyüklər arasında Avropa kuboku başa çatıb.
Sports.az xəbər verir ki, son yarış günündə daha 4 cüdoçumuz fəxri kürsüdə yer alıb.
Əjdər Bağırov -100 kq çəki dərəcəsində bütün rəqiblərini məğlub edərək qızıl medal qazanıb. Bu çəki dərəcəsində Elmar Qasımov bürünc mükafata sahib çıxıb. Xəyyam Əliyev (-90 kq) və Diana Tçkayeva (-48 kq) da turniri bürünc medalla başa vurublar.
Xatırladaq ki, ilk yarış günündə İslam Rəhimov (-66 kq) qızıl, Elşən Əsədov (-66 kq) gümüş, Babarəhim Mirzəyev (-60 kq), Nizami İmranov (-66 kq) və Rüfət Şövlətov (-73 kq) isə bürünc medal əldə etmişdilər.
Yekunda 2 qızıl, 1 gümüş və 6 bürünc medal qazanan Azərbaycan ümumi komanda hesabında üçüncü, kişilər arasında isə ikinci yeri tutub.
Azərbaycan Cüdo Federasiyasının hakimlər heyətinin üzvləri də Qori şəhərində keçirilən böyüklər arasında Avropa Kubokunda iştirak ediblər.
“A” kateqoriyalı beynəlxalq dərəcəli hakimlər Arzu Acalova və Rəşad Əliyev, “B” kateqoriyalı beynəlxalq dərəcəli hakim Ülvi Əliyev beynəlxalq turnirdə ədalət təmsilçiləri sırasında yer alıblar.
