İspaniyanın "Barselona" klubu ilk dəfə öz meydanında "Leqanes"ə məğlub olub.

Sports.az xəbər verir ki, bu, La Liqanın 17-ci turuna təsadüf edib.

Kataloniya klubu evdə "Leqanes"ə 0:1 hesabı ilə uduzub. Yeganə qolu 4-cü dəqiqədə müdafiəçi Serxio Qonsales vurub.

Bundan əvvəl "Barselona" La Liqada "Leqanes" üzərində 4-ü evdə olmaqla 7 qələbə qazanmışdı. Kataloniya təmsilçisi bir dəfə səfərdə bu rəqibinə məğlub olub.

"Barselona" hazırda turnir cədvəlində 38 xalla ilk pillədə qərarlaşıb.