Tahir Süleymanov "Zirə" - "Neftçi" oyunundakı hakim qərarını şərh etdi
"Zirə" - "Neftçi" qarşılaşmasında baş verən və kəskin ictimai qınağa, azarkeş etirazlarına səbəb olan hakim idarəçiliyi ilə bağlı müzakirələr, subyektiv, obyektiv fikirlər bu günə kimi səngimək bilmir.
Bu oyuna, ümumiyyətlə, çempionatın gedişinə, hakimliklə bağlı məsələlərə münasibət öyrənmək üçün beynəlxalq dərəcəli hakim, "Neftçi"nin ən uğurlu illərində klubun vitse-prezidenti olmuş Tahir Süleymanova müraciət etdik.
Müsahibimiz Sports.az-a qısa açıqlamasında aşağıdakıları bildirdi:
Çempionat finişə yaxınlaşır, gərgin oyunlar gedir. Hakimlər də buna hazır olmalıdırlar. Müsbət məqamlardan biri, oyun səviyyəsi ilə seçilən bəzi görüşlərdə 15-20 min azarkeşin tribunalara axışmasıdır. Bu, tamaşaçıların futbola inamının artmasıdır. Belə davam olunacağı, islahatların doğru istiqamətdə gedəcəyi halda, növbəti mövsümdə daha rəqabətli, maraqlı çempionat olacağı gözlənilir. Önəmli olan, bu inamın qırılmamasıdır. "Zirə" - "Neftçi" oyununda baş verənlərə gəldikdə, açıq-aşkar olan epizoda geniş şərh verməyə ehtiyac yoxdur. Çoxşaxəli referi-VAR səhvlərinin nəticəsidir və birbaşa oyunun nəticəsinə təsir edib. Ümumilikdə isə, konkret bir oyunun üzərində dayanmaq istəmirəm. Məsələyə kompleks və strateji yanaşılmalıdır. Çempionatın gedişində hakim səhvləri çox olub və təəssüf ki, bu tendensiya davam etməkdədir.
"Neftçi" son zamanlar baş məşqçi Vernidubun sayəsində bir qədər dirçəlir. Baxmayaraq ki, "Neftçi" kimi komanda üçün minimum hədəf çempionluq, kubokun qazanılması olmalıdır.
Dəfələrlə bildirmişəm, bir daha xüsusi məqama toxunmaq istəyirəm. "Neftçi"də bu sahə üzrə əcnəbi mütəxəssis də çalışır. İstənilən klub, qaydalar çərçivəsində özü-özünü müdafiə etməyi bacarmalı, bu misiyyanı ilk növbədə rəhbərlik, cavabdehlər daşımalı, sözünü deməli, bunu bacarmalıdırlar. Belə olduqda, məşqçi və futbolçuların özlərinə inamı daha da artır, haqsızlıq görəndə, çarəsiz, kimsəsiz qalmırlar.
Klubların müdafiəsi tək jurnalistlərin, azarkeşlərin, müstəqil ekspertlərin üzərində olmamalıdır. Klub rəsmiləri rahat həyatlarını sürəndə, komandanın yox, öz mənafelərini düşünəndə, münasibət də buna uyğun olur. Onların əvəzinə heç kimin borcu deyil mübarizə aparsın. Hər kəs bunu bilməlidir!
Bir ildən çoxdur sosial şəbəkələrdən istifadə etmirəm. Biz hər zaman sözümüzü demişik, deyirik, deyəcəyik də... "Neftçi" adına biz öz missiyamızı çempionluqlarla, qazandığımız kuboklarla çoxdan bitirmişik. Hər bir şəraiti olan "Neftçi"yə ən azından o dövrün nəticələrinin təkrarlanmasını, daha böyük uğurların qazanılmasını arzu edirəm.
