“Bu, məşqçi karyeramdakı ən yaxşı oyun idi”

PSJ-nin baş məşqçisi Luis Enrike UEFA Çempionlar Liqasının yarımfinalında “Bayern” üzərində qazanılan 5:4 hesablı qələbəni karyerasının ən yaxşı oyunu adlandırıb.

Sports.az xəbər verir ki, o, matçdan sonra jurnalistlərə deyib:

“Bu, çox gərgin oyun idi. Şübhəsiz ki, məşqçi kimi mənim ən yaxşı matçım idi. Özüm çox yoruldum, halbuki bir kilometr belə qaçmamışam. Futbolçuların necə hiss etdiyini təsəvvür etmirəm”.

İspaniyalı mütəxəssis deyib ki, yaxşılaşdırmalı olduqları məqamlar var: “Amma heyətində bu qədər yüksək səviyyəli futbolçu olan komandaya qarşı bu, çox da asan deyil. Dörd qol buraxdıq, üzərində işləməli olduğumuz məqamlar var. Bərpa olunacağıq, çempionat barədə düşünəcəyik, daha sonra isə diqqətimizi gələn həftəyə yönəldəcəyik. Düşünürəm ki, bizi oxşar oyun gözləyir”.

Qeyd edək ki, komandalar arasında cavab görüşü mayın 6-da Münhendə keçiriləcək.