“CBC Sport” bəyanat yaydı: ÇL oyunu niyə yayımlanmayıb?

"CBC Sport" telekanalı ötən gecə Çempionlar Liqasında yarımfinal mərhələsinin "Bayern" - PSJ cavab oyununun yayımının baş tutmaması ilə əlaqədar bəyanat yayıb.

Sports.az xəbər verir ki, görüşün Bakı vaxtı ilə saat 23:00-dan etibarən sözügedən telekanal vasitəsi ilə nümayişi nəzərdə tutulsa da, gözlənildiyi kimi olmayıb.

"CBC Sport" isə bəyanatında oyunun yayımlanmasının texiki problemlər səbəbindən mümkün olmadığını bildirib: 

"Əziz və hörmətli futbol azarkeşləri, mayın 6-da UEFA Çempionlar Liqasının yarımfinal mərhələsinin cavab oyunları çərçivəsində keçirilən “Bayern” – PSJ qarşılaşmasının yayımı texniki səbəblərdən mümkün olmayıb.

Gün ərzində yayım prosesi ilə bağlı aparılan ənənəvi testlər zamanı hər hansı problem aşkarlanmasa da, matçın başlamasına təxminən 5 dəqiqə qalmış gözlənilməz texniki nasazlıq yaranıb. Problem qeydə alınan andan etibarən onun aradan qaldırılması üçün bütün zəruri tədbirlər görülüb. Məqsədimiz nasazlıq aradan qalxan kimi, oyunun hansı dəqiqəsinin getməsindən asılı olmayaraq dərhal efirə qoşulmaq idi. Lakin texniki heyətin görüş boyu davam edən səylərinə baxmayaraq yayımı bərpa etmək mümkün olmayıb.

Baş verən bu xoşagəlməz hadisəyə görə məsuliyyətimizi tam dərk edir, oyunu sizə təqdim edə bilmədiyimiz üçün bütün futbolsevərlərdən üzr istəyirik.

Əziz idmansevərlər, anlayışınıza ümid edir və belə halların bir daha təkrarlanmaması üçün bütün lazımi addımların atılacağını bildiririk".