"Mezoterro və Kamara A millisinə cəlb edilə bilər" - Ayxan Abbasov
Avstriyanın Bad-Valtersdorf şəhərində təlim-məşq toplanışına başlayan milli komandamızın baş məşqçisi Ayxan Abbasov sports.az saytına açıqlamasında 21 yaşadək futbolçulardan ibarət yığma komandamıza cəlb edilən Lorenzo Mezoterro və Mustafa Kamara ilə bağlı məşqçilər korpusu ilə məsləhətləşəcəklərini və onların gələcəkdə əsas millidə çıxış edəcəklərini istisna etmədiyini deyib:
- Malta və San Marino ilə yoldaşlıq oyunlarına hazırlaşan heyətimiz bəllidi. 21 yaşadək futbolçulardan ibarət millimiz də yoldaşlıq matçları keçirəcək. Bundan sonra U 21-in məşqçiləri ilə ordakı futbolçuların vəziyyətini müzakirə edəcəyik. Lorenzo Mezoterro "Sampdoriya", Mustafa Kamara "Sent Trüyden"də çıxış edir. Mustafanın 18 yaşı var. Lorenzonun 18 yaşı tamam olmayıb.
Yetərincə perspektivli və böyük potensiala malikdilər. Lorenzonun qolçuluq keyfiyyətlərini hələ uşaq vaxtından hamımız bilirik.
Klublarındakı oyunlarını da izləyirik. Gələcəkdə A millisinə cəlb edilmələri və növbəti oyunlarda meydana çıxmaları istisna deyil.
