FİFA DÇ-2026-nın mükafat fondunu artıracaq
FİFA DÇ-2026-nın mükafat fondunu və iştirak haqqını artıracaq.
Sports.az xəbər verir ki, bu barədə "The Guardian" məlumat yayıb.
Genişləndirilmiş maliyyələşdirmənin təfərrüatları bu həftə Kanadanın Vankuver şəhərində keçiriləcək FİFA Şurasının iclasında təsdiqlənəcək .
Qeyd olunur ki, bu, bir sıra milli assosiasiyalar tərəfindən bildirilən narahatlıqlara cavabdır. Narahatlıqlar, xüsusən də bəzi oyunların keçiriləcəyi ABŞ-da uçuşlar, əməliyyatlar və vergilər üçün yüksək xərclərlə bağlıdır.
2025-ci ilin dekabr ayında FİFA DÇ-2026 üçün rekord məbləğdə 727 milyon dollar mükafat fondu elan etmişdi. İlkin plana əsasən, iştirakçı 48 komandanın hər biri minimum 10,5 milyon dollar, qalib komanda isə 50 milyon dollar qazanacaqdı. Lakin son həftələrdə bir neçə milli futbol assosiasiyası ilə məsləhətləşmələrdən sonra bu fond daha da artırılacaq.
Həmçinin futbolun inkişafı üçün FİFA-nın bütün 211 üzvünə ayrılan vəsaitin məbləği də yüksələcək. Bu məbləğ növbəti 4 illik dövr ərzində əvvəllər planlaşdırılan 2,7 milyard dolları keçəcək.
